Pasiteri Sangwa Deus, Umuyobozi wa Special Olympics mu Rwanda utangaza ko imyiteguro y’igikombe k’Isi ku bafite ubuga bwo mu mutwe igeze kure

Pasiteri Sangwa Deus, Umuyobozi wa Special Olympics mu Rwanda, wita ku bana bafite ubumuga bwo mu mutwe binyuze mu mikino, aratangaza ko imyiteguro yo kwitabira igikombe k’Isi ku bafite ubumuga bwo mu mutwe ikorwa neza kandi isa n’aho irimo kugana ku musozo.

Iyi mikino y’igikombe k’Isi y’abafite ubumuga bwo mu mutwe “Special Olympics World Summer Games”, izabera i Abu Dhabi muri Leta zunze Ubumwe z’Abarabu, kuva tariki 14-21 Werurwe 2019.

Aganira n’Imvaho Nshya, Pasiteri Sangwa yatangaje ko biteguye neza ku buryo bafite ikizere cy’uko igihe cyo kwitabira kizagera ibyo bakeneye biri ku murongo.

Ati “Imyiteguro ya Special Olympics irarimbanyije cyane ko turi mu kiciro gisa naho ari iya nyuma, irimo gukorwa neza nta kibazo kiraboneka kugeza ubu.”

Yemeza ko abakinnyi bazaserukira igihugu bameze neza kandi imyitozo igenda neza.

Ati “ Maze gusura aho bakorera imyitozo nk’inshuro 3, ariko nasanze mu by’ukuri biranejeje, hari igihe bakinaga ubuna basa naho bahuzagurika cyane, ari ko kuri ubu guhuzahurika byavuyeho, bafite abatoza beza, urebye bafite urwego rwiza.”

Mu gikombe k’Isi giheruka kubera i Los Angeles muri Leta zunze Ubumwe z’Amerika muri Nyakanga 2015, u Rwanda rwazanye imidali itandukanye irimo uwa zahabu bakuye mu mukino wo koga.

Abakinnyi 26 bazaserukira u Rwanda mu mikino y’Isi, bari mu mwiherero kuva tariki 17 Gashyantare kugeza 05 Werurwe 2019, hanyuma bazerekeze i Abu Dhabi tariki 08 Werurwe 2019.

U Rwanda rugiye kwitabira ku nshuro ya 5 iyi mikino y’Isi, rusahagararirwa mu mikino irimo umupira w’amaguru, kwiruka ku maguru, Koga na Boccia.

Ikipe y’umupira w’amaguru ihagaze bwuma
Imyitozo irarimbanyije kuri sitade Amahoro

Source: Imvaho Nshya.

TANGA IGITEKEREZO

Shyiramo Igitekerezo cyawe
Shyiramo Izina ryawe hano