Safi Madiba agiye gushyira hanze ukuri ku bintu bikomeye byose yaciyemoSafi Madiba agiye gushyira hanze ukuri ku bintu bikomeye byose yaciyemo

Umuririmbyi Safi Madiba uri mu bakunzwe cyane mu Rwanda muri iki gihe, agiye gushyira hanze album izaba ibumbiyeho indirimbo zikubiyemo ubutumwa buhishura ukuri ku byo yaciyemo.

Safi Madiba uheruka gusohora iyitwa ‘Good Morning’, yabwiye IGIHE ko ateganya gukora album izaba igizwe n’indirimbo ziganjemo izivuga ku bw’ibibazo yaciyemo, uko abayeho n’ahazaza he n’ibindi abantu bamwibazaho.

Album ya mbere Safi Madiba ari gukora yemeza ko izaba yihariye ashingiye ku bihangano azayibumbiraho, ubutumwa burimo ndetse n’uburyo yihinduye mushya muri muzika.

Yagize ati “Mbere nakoraga umuziki mu itsinda nyuma nkora ku giti cyanjye, byari nko gutangira. Kuba album narayise ‘Back to life’, navuga ngo ni ubundi buzima natangiye. Hari ubuzima nubatse bugera ahantu ndahagarika ntangira bundi bushya, nagarutse mu buzima bwa muzika ariko mu bundi buryo bushya. Ni nk’aho nari mvutse bundi bushya.”

Yongeyeho ko azagaruka cyane ku byagiye bimuvugwaho mu itangazamakuru n’uburyo hari ibimwerekeye byatamitswe abamukurikira bakabifata nk’ukuri kandi nyir’ubwite ntacyo yabivuzeho.

Ati “Ibyo nzagarukaho ni ubuzima, kuvuga ko hari ibintu bijya hanze abantu babwirwa bitari byo ariko habaka hari uburyo umuntu yabisobanura ariko ntibikunde. Nko kuri iyi album hariho indirimbo yitwa ‘Mambata’[iyo wambaraga inkweto ukazisobekeranya niko twabyitaga]. Mvuga uburyo abantu bagutega iminsi, mu nzira zawe bakakwitambika ariko icyo Imana ikora ni mambata, bya bindi bagukorera bagutega iminsi ugasanga nibyo biguha imbaraga zo gukora.”

Safi azihishura byinshi byerekeye ubuzima bw’urukundo yaciyemo mu myaka yashize n’uburyo abantu bamufata muri iki gihe. Mu byo azavuga, harimo ubuzima bwe n’urugo yashinze rukavugwaho byinshi.

Ati “Nzavuga no buzima bwanjye bw’urukundo rwanjye rwa kera, umuntu aba yarakundanye n’umuntu igihe kikagera mugatandukana bitewe n’impamvu zitandukanye ugahura n’undi […] Mu rukundo rwanjye uko byagenze muri make. Ni indirimbo uzabasha kuzumva neza, azamenya ubuzima naciyemo mu rukundo ndetse n’ibyo ndimo ubu.”

Safi amaze gukora indrimbo zigera kuri esheshatu mu zizaba zigize album ye ya mbere, harimo izagiye hanze zirakundwa cyane nka yitwa ‘Got it’ yafatnyije na Meddy akurikizaho izindi nka ‘Kimwe Kimwe’, ‘Fine’ ft Rayvanny, ‘My Hero’ nayo yacuranzwe cyane n’izindi.

Iyi album ateganya kuzayimurika mu gitaramo kinini azakora ku itariki ya 6 Ukuboza 2019.

Source: Igihe.com

 

TANGA IGITEKEREZO

Shyiramo Igitekerezo cyawe
Shyiramo Izina ryawe hano