Tour du Rwanda 2018 isigaje iminsi ine igatangira ku nshuro yayo ya 10 kuva yashyirwa ku ngengabihe y’Ishyirahamwe y’Umukino w’Amagare ku Isi (UCI), ikazaba ari n’iya nyuma ibaye iri ku bipimo bya 2.2 kuko umwaka utaha izahita ijya ku bipimo bya 2.1.

Izo mpinduka zisobanuye ko izaba ari rimwe mu masiganwa abiri akomeye muri Afurika hamwe na La Tropical Amissa Bongo.

Iri siganwa rizeguruka mu Ntara zose z’u Rwanda rizatangira tariki 5 Kanama risozwe tariki 12 Kanama 2018. Muri rushange rizitabirwa n’abakinnyi 80 bakomoka ku migabane yose y’Isi, bazaba bakinira amakipe 15.

Mu gihe abakunzi b’umukino w’amagare by’umwihariko abakurikiranye Tour du Rwanda kuva mu 2009 bitegura kuyibona ku nshuro ya 10, IGIHE yasubiye mu mateka ikusanya bimwe mu byayiranze mu nshuro ziheruka.

Ibyo wamenya kuri iri siganwa

1. Mu nshuro icyenda Tour du Rwanda imaze kuba, Abanyarwanda begukanyemo enye ziheruka harimo ebyiri za Ndayisenga Valens (2014 na 2016), imwe Nsengimana Jean Bosco (2015) n’imwe ya Areruya Joseph y’umwaka ushize.

2. Umunya- Eritrea Eyob Metkel n’Umunyarwanda Ndayisenga Valens basangiye agahigo ko aribo begukanye uduce (étapes) twinshi mu mateka ya Tour du Rwanda kuko buri umwe yatwaye dutanu, bagakurikirwa na Nsengimana Jean Bosco, Reijnen Kiel na Debesay Mekseb batwaye tune, naho Areruya Joseph yegukanye dutatu.

3. Ndayisenga Valens afite agahigo ko kuba ariwe mukinnyi wegukanye Tour du Rwanda ari muto ubwo mu 2014 yari afite imyaka 20 n’iminsi 326, agakurikirwa na Areruya Joseph wayitwaye afite imyaka 21 n’iminsi 323 mu gihe uwayegukanye akuze ari Umunyafurika y’Epfo Lill Darren wayitwaye mu 2012 afiye imyaka 30 n’iminsi 98.

4. Abakinnyi 44 b’Abanyarwanda nibo bamaze gusiganwa muri Tour du Rwanda kuva mu 2009 kugeza ubu, ikindi gihugu cyahagarariwe na benshi kikaba ari Afurika y’Epfo (37), u Bufaransa (30), Érythrée (28), Ethiopia (27), Kenya (21) , Leta Zunze Ubumwe za Amerika na Alegria bikanganya 15.

5. Mu mateka ya Tour du Rwanda ibihugu birimo Ukraine, Slovenia, Sudani, Argentina, u Burusiya, Uzbekistan, Colombia, Portugal, Croatia, Philippines n’u Bwongereza byagiye bihagararirwa n’umukinnyi umwe rukumbi mu bihe bitandukanye by’iri rushanwa kuva mu 2009.

6. Umunyamerika Reijnen Kiel niwe wegukanye Tour du Rwanda arusha ibihe bito umukurikiye, ubwo mu 2011 yarushaga mugenzi we w’Umunyamerika Rosskopf Joey amasegonda 0:02, mu gihe Areruya Joseph umwaka ushize yaritwaye asiga Eyob Metkel bakinanaga muri Dimension Data amasegonda 0:28.

7. Umukinnyi wegukanye Tour du Rwanda asiga uwa kabiri ibihe binini ni Umunya-Maroc Jelloul Adil wabikoze mu 2009, arusha umwenegihugu mugenzi we Saadoune Abdelati iminota 3:15, naho mu 2013 Umunyafurika y’Epfo Girdlestone Dylan aritwara arusha mugenzi we Meintjes Louis iminota 2:01.

8. Kuva mu 2009, muri Kigali hamaze gutangirizwa uduce 34 twa Tour du Rwanda hasorezwa 31. Mu nshuro icyenda iri rushanwa rimaze kuba, zose ryageze mu murwa mukuru w’u Rwanda, agahigo usangiye na Huye, mu gihe umujyi wa Rubavu wo mu 2016 utakiriye iri siganwa.

9. Umunya-Éritrea Eyob Metkel ni we mukinnyi rukumbi umaze gusoza ari uwa kabiri muri Tour du Rwanda ebyiri zitandukanye, aho yabikoze mu 2016 agafasha Ndayisenga Valens bakinanaga muri Dimension Data kwegukana iri siganwa, abisubiramo mu 2017, ryegukanwa na Areruya Joseph bakinanaga muri Dimension Data.

10. Umunyamerika Reijnen Kiel niwe mukinnyi wabashije kwegukana uduce twinshi mu isiganwa rimwe, aho yatwaye tune mu 2011 birangira n’iryo siganwa aritwaye naho Nsengimana Jean Bosco akaba yaregukanye dutatu mu 2015 nawe birangira yegukanye n’isiganwa ryose.

11. Muri duce 73 tumaze gukinwa kuva Tour du Rwanda kuva yaba mpuzamahanga, Eritrea imaze kwegukana twinshi (19) dutwawe n’abakinnyi 10 batandukanye, igakurikirwa n’u Rwanda rwegukanye 18 twatwawe n’abakinnyi barindwi batandukanye. Maroc yegukanye uduce icyenda.

12. Ku nshuro ya mbere Tour du Rwanda izanyura mu Karere ka Rutsiro hakazaba hakinwa agace ka Musanze- Karongi n’aka Karongi-Rubavu twose tuzaba dukinwe ku nshuro ya mbere.

Source: Igihe.com

TANGA IGITEKEREZO

Shyiramo Igitekerezo cyawe
Shyiramo Izina ryawe hano